Kènjeroptoch Maondig 20 Fibberwari 2023

De 11de van de 11de lèg alweer ein tiedje achter ós en 't nuje vastelaovessezoen belaof weer ein echt normaal jaor te waere, mit eindelik weer ein echter Groate Waereldsjtadoptoch én ein Kènjeroptoch. Dus zo wie 't leedje van de SAP al zaet: 

"Doog mit, gaef door, gaef 't wiejer dat 't noajts zal euvergaon!"

Oeteindelik make allein de deilnömmers de Optoch en hawte zie dees tradisie in eëre. Zeet geer nog aan 't twiefele of geer mit wilt doon of wilt geer toch get meë informasie, nöm gerös kontak mit ós op! Veer numme de twiefel gaer weg en ongersjteune  gaer wo v'r dat kènne. 

De route van de kènjeroptoch op maondig 20 Fibberwari wurt angesj en zal meë nao 't idee van de alternatieve optoch van 2022 waere, en dus veural bènne de voetgangerszone van 't Centrum zeen. Zo vermijde veer drukke verkeerspunte en kruusinge, die de lètste paar edisies ein aantal kere veur sjpannende momente höbbe gezörg. Dat will veer neet meer. De route is och get korter, de lengte van de awwe kènjeroptochroute waor ein väöl geheuërde opmerking vanoet de awwesj van de allerkleinste deilnömmers.

De Kènjeroptoch vertrèk om 14:11. Op ongersjtaond plaetje is de nuje optochroute aangegaeve. De optoch zal loupe van de Greunsjtraot de Salmsjtraot in, door de Raodhoessjtraot, nao de Awwe Mèrt, euver de Nuje Mèrt en weer ontbènjing in de Greunsjtraot. Aansjletend zal de priesoetreiking en de toekenning van de tante José Wisseltrofee, weer in de Hanenhof plaatsvènje. 

Insjrieve kènt uuterlik tot maondig 20 fibberwari 2023 bie de jury taofel in de Hanenhof veur aanvangk van de optoch óf door 't  ingevulde formuleer (hiej onger te downloade) te sjtuure nao optocht@flaarisse.nl