Groate Waereldsjtadoptoch Zondig 19 fibberwari 2023

De 11de van de 11de lèg alweer ein tiedje achter ós en 't nuje vastelaovessezoen belaof weer ein echt normaal jaor te waere, mit eindelik weer ein echter Groate Waereldsjtadoptoch én ein Kènjeroptoch. Dus zo wie 't leedje van de SAP al zaet: 

"Doog mit, gaef door, gaef 't wiejer dat 't noajts zal euvergaon!"

Oeteindelik make allein de deilnömmers de Optoch en hawte zie dees tradisie in eëre. Zeet geer nog aan 't twiefele of geer mit wilt doon of wilt geer toch get meë informasie, nöm gerös kontak mit ós op! Veer numme de twiefel gaer weg en ongersjteune  gaer wo v'r dat kènne. 

De Groate Waereldsjtadoptoch zal dit jaor op zondig 19 fibberwari vanaaf 13:49 oer door de Waereldsjtad trèkke. De route zal weer es vanouds zeen, mit opsjtèlle in de van Banninglaan. De route löp via de Brouwerssjtraot, de Norbertijnensjtraot, de Beekhovensjtraot, Riekswaeg Centrum, Mauritslaan, Graaf Huynlaan en de Awwe Mèrt. Nao aafloup van d'n optoch zal de bekèndmaking van de optochwinnaars in de Hanenhof plaatsvènje, bepaald door de Optochjury en zal ouch 't tradisionele oetreike van de Jean Janssen Wisseltrofee door de Opperflaaris plaatsvènje. 

Insjrieve kènt t/m 11 fibberwari. Deilnömmers kènne 't optochnummer ophaole op zaoterdig 11 fibberwari tössje 16:00 en 18:00 oer in café de Kroon aan de Roadhoessjtraot 31. Downoad hiejonger 't insjriefformuleer veur de optoch en de reklameoptoch en 't optochreglement.