INSJRIEVE KÈNJEROPTOCH

"Doog mit, gaef door" optoch op vastelaovesmaondig
"Es kleine sjnaak van 7 jaor sjting ich greuëtsj aan de kantj,
De bontje sjtoet dae trok veurbiej, ich heel de pap zien handj.
Hae goof get door, dat veulde goot, mien hart dat ging te keer,
Ein heel apaart geveul dat sjmaakte nao väöl meer."

Op vastelaovesmaondig 12 fibberwari 2024 vanaaf 14:11 oer trèkke wie vanouds de jeugprinse en jeugprinsesse mit häör gevolg door de bènnesjtad van Gelaen Centrum. Deze Kènjeroptoch höbbe De Flaarisse - geïnspireerd door ‘t hitnummer van de Soosjeteit Awt Prinse - ómgeduip tot de: “Doog mit, gaef door" Optoch.

De optoch is namelijk neet allein mer op de jeug gerich, mer op jederein dae dat sjoane vastelaovesgeveul aan ein volgende generasie (of aan nuje inwoners van de Waereldsjtad) wilt doorgaeve. Loup dus es einzelgänger, duo, kleine of groate groep mit en laot zeen wie en aan wae'ste de vastelaovend doorgaefs!

Opa of oma mit de kleinkenjer, nónk en tant mit ‘t naefke of nickske, 4 generasies, meister en juffrouw mit de klas, de sportcoach mit ‘t team, same mit ein vrundj of vriendin van boetlandse aafkóms, of eine awt prins mit ziene awt jeugprins. Of dreij ‘t om en loup mit, mit degene dae dich oajts de vastelaovend mit de paplaepel haet ingegaeve. 

Daobiej is d’r oetgebreid ruimte veur leuke kreatieve ideeje die zónger al te väöl veurbereidinge en op ‘t letste moment nog ineingesjteeld kènne waere. Insjrieve kènt via óngersjtaond insjriefformulier of op maondig 12 fibberwari vanaf 13:11 oer bie Café De Vlaegel. 

De route
Opsjtelle Graaf Huynlaan - Auwe Mert (1ste doorkóms langs Ferons Corner), Nuje Mert, Greunsjtraot, Salmsjtraot, Auwe Mert (2de passage Ferons Corner), ontbènjing veur 't Sjtadhoes. 

Aafhaole van de Optochnummers vèngk plaats op zaoterdig 3 fibberwari 2024 tösje 16:00 en 18:00 oer in Eetcafe Hotel De Kroon, aan de Raodhoessjtraot 31 te Gelaen. En op maondig 12 fibberwari vanaf 13:11 oer bie Café De Vlaegel. 

Namens de Optochkemissie, 
Roel Rothkrans