Äöpening jubileumsezoen 2023-2024

't Is dát biezunjere laevesgeveul dat twelf wieke en buurte verbènjd: de Waereldsjtadvastelaovend. Op 11 november äöpene veer 't “viefde sezoen” en daomit ós jubileumsezoen tradisiegetroew mit eine dialekmès in de Sint-Augustinuskirk, gevolg door ’t oplaote van de Aafgebrende Gaaskaetel bie Café de Kroon.

📅 Zaoterdig 11 november 2023.
🕣14:00u Dialekmès in de Sint-Augustinuskirk.
🔥 15:11u Oplaote Aafgebrende Gaaskaetel bie De Kroon.
🎉Aansjletend feës bie de horeca in de bènnesjtad.

Program Café De Kroon
Op de 11de van de 11de trapt De Kroon 't vastelaovessezoen aaf mit ein Open Air program. Nemes minder es️ De Badmötse, Richtig Rex, Gwen Dohmen, Zaate Hermenie Gein Idee, DJ Fiasco, Kartoesj en Mr. Loco Loco zètte de Raodhoessjtraot op häöre kop! Entree is gratis. Dresscode: vastelaovend.

Program 11de van de 11de bie Café De Kroon, Gelaen.

7x11 jaor Flaarisse
Saer 1947 maak de georganiseerde vastelaovend integraal deil oet van de Gelaense identiteit. 7x11 jaor SVV De Flaarisse sjteit veur bónte sezoene, talrieke gesjminkde gezichte, ontelbare kestuums en nog väöl meë sjlok, oetbunjige zittinge en de sjoanste vastelaovesoptochte. Mèr 't sjteit ouch veur ein väölvoud aan vereniginge, vriewilligers, muzikante en vastelaovesvierders, die allemaol ein sjtökske biedrage aan dit prachtige volksfeës dat veer van 11 november pès Esjelegoonsdig viere.

Ós Waereldsjtad vlamt
De 77ste verjaordig van Sjtadsvastelaovesvereniging De Flaarisse is neet allein ein groat feës veur de vereniging, mer baovenal eine veur gans de Waereldsjtad. Tensjlotte is jedere Gelaendenaer eine flaarin of flaaris. Daoróm wille veer gaer dit biezunjere jubileumsezoen same mit uch viere: de VIEF van Gelaen, ózze Flaarisse-femilie, alle bevrunje parapluujvereniginge en alle luuj van ós Waereldsjtad (en wied dao boete).

Dat doon veer ónger 't jaorthema: 'Ós Waereldsjtad Vlamt', wobie veer uch ein utesj gevarieerd en oetbunjig vastelaovesprogram prizzentere. Zoa brènge veer de vastelaovend - zoa wied geer van ós gewènd zeet - kort bie de luuj, koestere veer ózze tradisies en gaeve veer de 'vlam' door.