"Doog Mit, Gaef Door"
Kènjeroptoch
"Höb geer 't ouch al geheuërd? De Gelaense Kènjeroptoch wört vanaaf 2026 verplaats nao ein anger moment in 't Vastelaoves-sezoen." Laes wier veur alle ins & outs euver dees wijziging in 't Gelaense Vastelaovesritme...
N
uje datum
Van oudsher trok de Gelaens Kènjeroptoch oppe Vastelaovesmaondig door de sjtraote. Trükloupende belangsjtelling en euverleg mit ein speciaal samegesjtelde klankbordteam haet geresulteerd in de keuze veur ein nuuj vast moment: de zaoterdigmiddig van 't lètste weekend veuraafgaond aan de Vastelaovend. In 2026 zal dat zeen op zaoterdigmiddig 7 fibberwari.
Klankbordteam
Ein diverse groep Gelaense vastelaovesvierders, wo onger, awt optochdeilnummers, ein aafvaardiging van de Vief van Gelaen, de Jonkheid, Evenementenverkeersregelaars, senatoren, awt prinse, adjudante, juryleden, basissjoalleerkrachten en Flaarisse, haet zich nao de aafgeloupe vastelaovend onger leiding van de Optochkemissie biejein gesjnap en diverse aanpassinge veurgestjeld aan de organisasie van de Kenjeroptoch. Naeve ein nuje datum, haet dit ouch geleid tot 't oetteikene van ein nuje langere route door 't Gelaense Centrum.
Nao de beneuëdigde aafsjtömming mit Gemeinte, Weekmarkt, BOA's, en de hulpdeenste, kènne veer deze nuje datum en route noe mit uch, de Gelaense Vastelaovesvierders, deile!
Nuje Route
De nuje route veur de Gelaense Kènjeroptoch löp es volg:
Bernhardstraat (voorlangs Café 't Vlaegelke) - Raadhuisplein, Raadhuisstraat - Salmstraat - Gravenstraat - Nieuwe Markt - Gravenstraat - Elisabethstraat - Annastraat (lus tot aan de Mauritslaan en terug) - Markt (oude horecastraatje) - Markt (2de doorkomst langs Café 't Vlaegelke) - Raadhuisplein, Raadhuisstraat - Salmstraat.
Aansjloetend priesoetreiking in de Hanenhof, alwo op dat moment ouch de oetreiking van de optochnummers veur de Groate Waerelsjtadoptoch van Vastelaoveszondig zal zeen.
Meë info
De insjrieving äöpent binnekort. Diverse sjoale, buurt- en sport-vereniginge zulle aktief door de optochkemissie benadert waere , om nao te denke euver deilname aan deze nuje opzat van de Kènjeroptoch.
De wirkgroep sjteit bol van de ideeje die de kommende tied verder oetgewirk waere, en welke veer binnekort aan uch zulle presenteere.
Daonaeve wirke de Flaarisse same mit diverse partieje die zich al gemeld hubbe aan ein leuke, originele alternatieve invulling veur de Vastelaovesmaondig. Ouch dao euver kènt geer binnekort meë info verwachte.
Kortom: "Gelaen, dao zit meziek in!"