SJTADSPRINS SJOERD I (2023)
Sjónge, jónge, wat moosj hae lang wachte en ’t groate geheim veur zichzelf hawte. Want eigelik, naodat de Vastelaovend van 2021 bienao gans in ’t water waor gevalle door corona, leek ’t d’r op dat De Flaarisse nao tweë jaor heersjappie van Daan II Zweipfenning in jannewari 2022 de nuje Sjtadsprins Sjoerd I Reintjens koosjte oetrope. Mer weer ging alles toe, weer ’n lockdown, wonao Sjoerd nao wies euverlèk besjloot ’n jaor te wachte mit zien prinssjap.
Dat d’r oeteindelik oppe valreep toch in 2022 toch nog vastelaovend gevierd koosj waere ging Sjoerd waal aan ’t hart, mer hae besefte ouch dat ’t ganse veursezoen mit oetroping, resepsies en alle zittinge aan häöm veurbie waore gegange. “Ich höb d’r ummer van gedruimd Sjtadsprins te waere, mer dan wils te natuurlik waal alles op en top belaeve. Daomit waor ’t veur mich neet lestig óm ’n jaor te wachte en mien moel te hawte.
‘t Ènnige wo ich mich drök óm maakte waor of d’r neet weer ’n oetbraak zou kómme mit ’n lockdown, mer gelökkig zuut ’t d’r nao oet dat veer ’t virus genog ónger de knee höbbe óm ’n gans sezoen van alle vastelaovesaktiviteite te kènne genete. ‘t Lange wachte is beloand.”
Ofsjoan al bienao angerhawf jaor geleje, wit Sjoerd nog precies wie Opperflaaris Bert häöm benaderde óm Sjtadsprins te waere. “Ich wirkte toen bie Fletcher naeve ’t Fortunasjtadion en kreeg via Facebook de vraog of veer nog luuj zochte veur de bedening en of ich Bert daoeuver trök koosj belle. Ich wis natuurlik dat Bert daegene is dae de Prins oetkeus en vóng zien vraog waal ’n bietje vraem, dus veurdat ich trök belde, hej ich waal zoaget van: zou hae mich es Prins gaon vraoge?”
‘t Veurgeveul van Sjoerd waor perfek. “Ich hej ummer gehaop dat de vraog ’n keër zou kómme, mer begoosj mich al ’n bietje drök te make, ómdat ich neet meë zoa jónk bèn.” Zörge óm niks, want mit zien 28 jaor is Sjoerd zeker neet de awdste Prins oet de gesjiedenis van De Flaarisse. “Ich höb doa aafgesjpraoke bie Bert óm te heuëre wat ’t Prinssjap allemaol inhilt. Ich höb nog effe bedènktied gevraog, mer wis eigelik dat ich deze kans neet veurbie zou laote gaon.” Zeker neet, naodat hae ouch de mam (Hermien) en pap (Paul) op de heuëgte hej gebrach. “Mam waor metein door ’t dolle haer. ‘Jóng, dat mot se zeker doon’, zag ze. Pap waor effe get gereserveerder, mer dat waor ómdat hae zich aafvroog wie dat allemaol gepland moosj gaon waere. Mer al heël sjnel wis ‘r dat dat allemaol good zou kómme en zoog hae ’t ouch gans zitte.”
Dat Sjoerd al van kiensj aaf aan d’r van druimde Sjtadsprins te waere is neet vraem es te zien gesjiedenis kèns. Al gans jónk leep hae mit pap, mam en ’n groate groep vrunj van de femilie in de optoch van de Waereldsjtad mit. “Ich bèn d’r waal mit opgegreujd, jao. Bèn ouch bie de jeugraod van De Flaarisse gewaes en haopde toen al
Jeugprins te waere. Dat is d’r neet van gekómme, mer dat wurt noe döbbel en dwaesj gecompenseerd es groate Sjtadsprins.”
Wie gezag, veel ’t jaor wachte Sjoerd neet heël zjwaor. “Effe, wie d’r toch vastelaovend waor en veural wie de optoch door ’t centrum trok, toen dach ich waal: dat hej ich ouch kènne zeen. Probleem is dat-ste d’r dan mit nemes euver kèns kalle. Mer ich hej bewus gekaoze óm ’n jaor te wachte.
Ich wis woróm en dan kèns te dat ech waal opbrènge.”
Es Prins Sjoerd I zal hae zich dit vastelaovessezoen laote bedene in ós Gelaense cafeekes en feëszale. Normaal sjteit Sjoerd aan de angere kantj, want hae haet ’n opleiding bie Gilde in Venlo gevolg es horecaóngernummer en manager. Nao zeve jaor bie Fletcher, wo Sjoerd zich opwirkte vanoet de bedening tot restaurantmanager, haet hae noe saer bienao ’n jaor ’n nuuj oetdaging gevónje bie De Bokkeriejer baove oppe berg in Sjweikezze. “Veurdeil is dat dao veural euverdaag gewirk mot waere en get minder ’s aoves. Daodoor höb ich get meë tied veur femilie, vrunj en vrunjdin.”
Jao, leef vrouwluuj van de Waereldsjtad, ózze Prins is neet meë te höbbe. Al vief jaor is hae ’n koppel mit Myrthe, aafkómstig oet Sjènne. Myrthe is neet zoa groat gebrach mit vastelaovend es Sjoerd, mer begrip heël good dat de druim van heure vrundj wirkelikheid wurt. “Kiek, ich waer gein prinses, dus mien rol is oppe achtergróndj en dat vènj ich fijn”, zaet Myrthe. “Mer ich vènj ’t waal heël biezunjer en verheug mich ouch d’r op óm alles van heël kortbie mit te kènne make.”
Sjoerd I zal de Waereldsjtad gaon regere same mit zien adjudante Jeroen Reintjens (jao, ziene broor) en Indy Olthof. Nae, zaet Sjoerd, Jeroen is neet sjaloes. “Dae hej neet de ambisie óm Prins te waere, mer vintj ’t waal geweldig óm adjudant te zeen. Sjus wie Indy, al heël lang ‘ne geweldige vrundj van mich.” Euveriges haet Sjoerd nog ’n broor - Niels - mer dae woont gans in Groningen. “Nump neet weg dat hae regelmaotig d’r bie zal zeen, want dae wilt dat neet allemaol misse”, verklap Sjoerd. En zoa weit geer - leef vastelaovesvrunj - alvas get euver ózze nuje Sjtadsprins. Geneet same mit häöm van ózze sjoane vastelaovestied in de Waereldsjtad, woeuver Sjoerd I geit regere mit ziene liefsjpreuk:
Ós Waereldsjtad,
dao kènt nemes taegeop
Same hosse, drènke, zènge
En ich maog eindelik veurop
Heerlik Gelaen!